Pension : செய்திகளும், உண்மைகளும்!

சில நாட்களாக பென்சன் குறித்த செய்திகள் எங்கும் பரபரப்பாக பேசப்படுகிறது. பென்சன் கொடுப்பதற்கு சம்மதம் தெரிவித்து, மத்திய நிதியமைச்சர் ப.சிதம்பரம் உத்தரவிட்டு விட்டதாகவும்,  விரைவில் கிடைத்துவிடும் என்றும் சொன்னார்கள். PGBOA General Secretaryக்கு நிதியமைச்சர் கடிதம் எழுதி இதனை தெரிவித்திருப்பதாக சொன்னார்கள்.

அந்தக் கடிதத்தை வெளியிட்டு, எதோ நாளைக்கே, அவர்களது முயற்சியால் பென்ஷன் கிடைக்க இருப்பது போல ஒரு தோற்றத்தை உருவாக்கி வருகிறார்கள். நிதியமைச்சரே அவர்களுக்கு கடிதம் எழுதி இருப்பது குறித்து வேண்டுமானால் பெருமை கொள்ளலாம். நிதியமைச்சரோடு நெருக்கமாக இருக்கும் சில தனிநபர்களின் முயற்சியாலும் ஏற்பாட்டிலும் இது நடந்திருக்கிறது என்பது அனைவருக்கும் தெரியும்.

மற்றபடி, அந்தக் கடிதத்தில் ஒன்றுமில்லை.  காலம் பூராவும் ஊழியர் விரோதமாகவே செயல்பட்டவரும், முதலாளிகளுக்குச் சேவகம் செய்வதற்காகவே பிறவி எடுத்தவருமான திரு.ப.சிதம்பரம்  அதில் உண்மைகளை திரித்துக் கூறியிருக்கிறார். உண்மை என்ன ஏது என்று தெரியாமலேயே, அதை ஒரு சங்கம் தூக்கிப் பிடிப்பதும், கொண்டாடுவதும்தான் துயரம்.

நமது சங்கத்தின் செய்திகளையும், சர்க்குலர்களையும், வெப்சைட்டையும் தொடர்ந்து பார்த்து வருபவர்களுக்கு பென்ஷன் குறித்த உண்மையான அனைத்து தகவல்களும் தெளிவாய் புரியும்.

அந்தக்  கடிதத்தில்,  2012ம் ஆண்டு ஜூன் மாதத்தில் வணிக வங்கி ஊழியர்களைப் போன்று, கிராம வங்கி ஊழியர்களுக்கும் பென்ஷன் கொடுப்பதற்கு அரசு கொள்கை ரீதியாக ஒப்புக்கொண்டதை முதலில் குறிப்பிட்டு இருக்கிறார். இது நம் அனைவருக்கும் தெரிந்த செய்திதான். ஆனால் மத்திய அரசு அதனை ஒன்றும் சாதரணமாக ஒப்புக்கொள்ளவில்லை. நமது அனைவரின் கடுமையான போராட்டங்களினால் மறைந்த நமது மகத்தான தலைவர் தோழர்.முகர்ஜியிடம், அப்போது நிதியமைச்சராய் இருந்த திரு.பிராணாப் முகர்ஜி அவர்கள் நேரில் ஒப்புக்கொண்டார். கிராம வங்கி ஊழியர்களுக்கு பென்ஷன் வழங்கும் Office Note  கையெழுத்திட்டதும், அந்த Office Note ஐ அப்படியே நாம் உடனடியாக வெளியிட்டதும் அனைவருக்கும் தெரியும்.

அடுத்ததாக, ஒரு Model Pension Scheme  25.6.2013 அன்று உருவாக்கப்பட்டதை நிதியமைச்சர் தெரிவித்திருக்கிறார்.  அந்த Model Pension Scheme ஐ உருவாக்கும் பொறுப்பை நபார்டுக்கு  ஒப்படைத்து எழுதிய கடிதத்தையும் ,   அதில்  அரசு நிர்ணயித்த  விதிகளையும்  ஏற்கனவே நாம் அப்போதே  சர்க்குலரில் வெளியிட்டு இருந்தோம். மத்திய அரசுக்கும், நபார்டுக்கும் இருந்த முரண்பாடுகள் குறித்தும் தெரியப்படுத்தி இருந்தோம். இறுதியாக அந்த Model Pension Schemeஐ அப்படியே நமது வெப்சைட்டிலும் வெளியிட்டு இருந்தோம்.

இதுவரைக்கும் சரியாகச் சென்று கொண்டு இருந்த விவகாரம், அடுத்து மத்திய அரசு சுப்ரீம் கோர்ட்டில் அப்பீலுக்குச் சென்றதும்தான், முட்டுக்கட்டை போடப்பட்டு நின்றது. மத்திய அரசு 9.7.2013 அன்று  தாங்கள் கிராம வங்கி ஊழியர்களுக்கு பென்ஷன் திட்டம் கொடுக்க கொள்கை ரீதியாக ஒப்புக்கொண்டு இருப்பதையும், ஒரு மாடல் பென்ஷன் திட்டத்தை இறுதிப்படுத்தி இருப்பதாகவும் அதன்படி அமல்படுத்தலாம் எனவும் சுப்ரீம் கோர்ட்டில் affidavit தாக்கல் செய்தது. நாம் அந்த affidavit-ஐ அப்படியே நமது வெப்சைட்டில் வெளியிட்டு இருந்தோம். இதுவும் அனைவருக்கும் தெரியும்.

அதற்கப்புறம் பல தேதிகளில் ஹியரிங் போடப்பட்டும் நமது வழக்கு எடுக்கப்படாமலேயே காலம் தாழ்த்தப்பட்டது. இதைத்தான் நிதியமைச்சர் , அரசு மீது எந்தத் தவறும் இல்லாதது போலவும், அரசு பென்ஷன் திட்டத்தை கோர்ட்டில் ஒப்புக்கொண்டு நடைமுறைப்படுத்த தயாராக இருப்பதாகவும், ஆனால் வழக்கு ஹியரிங்குக்கு வராமலேயே போய்க்கொண்டு இருப்பதாகவும்  அவரது கடிதத்தில் சொல்லி இருக்கிறார்.

பிறகு நிதியமைச்சர் என்ன சொல்கிறார்? கோர்ட்டில் வழக்கை சீக்கிரமாக முடிப்பதற்கு அரசு தரப்பில் instructions  கொடுக்கப்பட்டு விட்டதாகவும், வழக்கை சீக்கிரமாக முடிப்பதற்கு employees union ஒத்துழைக்குமாறும் சொல்லியிருக்கிறார்.  இங்கு அவர் employees union என யாரைக் குறிப்பிடுகிறார் என்பது அனைவருக்கும் தெரியும்.  இங்குதான் நிதியமைச்சரின் அப்பட்டமான பொய்யும் புரட்டும் அடங்கியிருக்கிறது. கீழ்க்கண்ட கேள்விகளும் எழுகின்றன.

1. 25.6.2013 பென்ஷன் திட்டத்தை  இறுதிப்படுத்தினால், 9.7.2013 அன்று சுப்ரீம் கோர்ட்டில் ஏன் affidavit தாக்கல் செய்ய வேண்டும்?
2. இறுதி செய்யப்பட்ட பென்ஷன் திட்டத்தை அமல்படுத்திவிட்டு அதனை கோர்ட்டில் தெரிவிக்கலாமே?
3. கோர்ட்டில், ஹியரிங்குக்கு வராமல் போனதற்கு நமது சங்கத்திற்கு என்ன விதத்தில் பொறுப்பு  இருக்கிறது?
4. வேண்டுமென்றே  வழக்கை இழுத்தடித்துக் கொண்டு இருப்பது யார்?

தோழர்களே, இங்கு சில உண்மைகளை தெரிந்துகொள்ள வேண்டும்.


மத்திய அரசு லாபமிட்டும் கிராம வங்கிகளுக்கு மட்டும் பென்ஷன் உண்டு என்றும், பென்ஷனுக்கான நிதியில் 30 சதவீதம் ஊழியர்கள் ஏற்க வேண்டும் எனவும் சொல்கிறது. இதனை நாம் ஏற்கவில்லை.

தொடர்ந்து சுப்ரீம் கோர்ட்டில் வழக்கு ஹியரிங்குக்கு வராமல் போவதை சரிசெய்ய நாம் special mention  petition  ஒன்றை 18.2.2014 அன்று தாக்கல் செய்திருந்தோம். அதன் அடிப்படையில்   வழக்கு 25.3.2014ம் தேதி இறுதி விசாரணைக்கு வர இருக்கிறது. எப்படியும் தீர்ப்பு நமக்கு சாதகமாக வர இருக்கிறது.

மேலே குறிப்பிட்ட வழக்கு, இராஜஸ்தான் ஹைகோர்ட் தீர்ப்பினை எதிர்த்து மத்திய அரசு, சுப்ரீம் கோர்ட்டில் அப்பீல் செய்த வழக்கு.

இதுபோக, கர்நாடகா ஹைகோர்ட்டில் நமக்கு பென்ஷனும், கம்ப்யூட்டர் இன்கிரிமெண்டும் கொடுக்க வேண்டும் எனவும் ஒரு தீர்ப்பு வெளிவந்தது தோழர்களுக்கு நினைவிலிருக்கும். மத்திய அரசு அதனை எதிர்த்து அப்பீல் சென்றது. அந்த அப்பீலும் கடந்த பிப்ரவரி மாதம் டிஸ்மிஸ் செய்யப்பட்டு விட்டது.

ஆக எப்படியும், நமக்கு பென்ஷன் வருவது உறுதியாய் இருக்கிறது. இந்த நிலையில் இப்படியொரு கடிதத்தை நிதியமைச்சர் எழுதி, எதோ அரசே மனமுவந்து கொடுக்க இருப்பது போல ஒரு தோற்றத்தை ஏற்படுத்துகிறார். (தேர்தல் படுத்தும் பாடு!).

முழு விபரங்களை தெரிந்துகொள்ள படியுங்கள்:
1.Parity in Pension! Historic Achievement by AIRRBEA
2.RRB Employees PENSION SCHEME : HIGH LIGHTS
3.Parliament question for pension Scheme in RRBs and Reply of Minister
4.Important Govt. Correspondence Regarding Pension Scheme to RRB Employees!
5.Pension : Govt submitted its Affidavit